ಇತರ
ತುಳು ಭಾಷೆದ ಅಧಿಕೃತ ಸ್ಥಾನಮಾನೋಗಾದ್ ವಿಶೇಷ ಪತ್ರಿಕಾ ಗೋಷ್ಠಿ – ರಾಜರಾಮ ಶೆಟ್ಟಿ
ಕರ್ನಾಟಕ ರಾಜ್ಯೋಡು ನಮ್ಮ ತುಳು ಭಾಷೆಗ್ ಅಧಿಕೃತ ಸ್ಥಾನಮಾನ ತಿಕ್ಕೊಡುಂದು, ತೌಳವ ಸಂಗಮದ ಶ್ರೀ ಉಪ್ಪಳ ರಾಜಾರಾಮ ಶೆಟ್ಟಿ ಮೆರೆನ ಮುತಾಲಿಕೆಡ್ ಬೆಂಗಳೂರು ಪ್ರೆಸ್ ಕ್ಲಬ್ ಡ್ ವಿಶೇಷ ಪತ್ರಿಕಾ ಗೋಷ್ಠಿ 08-03-2025 ಕ್ ನಡತ್ಂಡ್.
ಪಳ್ಳಿ ವಿಶ್ವನಾಥ್ ಶೆಟ್ಟಿ ಪತ್ರಿಕಾ ಗೋಷ್ಠಿದ ಬಗ್ಗೆಡ್ ಪ್ರಾಸ್ತಾವಣೆ ಮಲ್ತೆದ್,ತುಳುವೆರೆನ ಜೋಕುಲೆಗ್ ಮಾತೃಭಾಷಾ ಶಿಕ್ಷಣದ ಅವಕಾಶ ಬೊಕ ಸವಲತ್ ತಿಕ್ಕೊಡುಂದು ಬಿನ್ನಪ ಮಲ್ತೆರ್ . ಅನುಭವಿ ವಕೀಲೆರಾಯಿನ ಶ್ರೀ ದೀಪಕ್ ಶೆಟ್ಟಿ ಬೇಲಾಡಿ ತುಳುಭಾಷೆದ ಕಾನೂನಾತ್ಮಕ ಸ್ಥಾನಮಾನೋಗಾದ್ ಉಪಯುಕ್ತ ವಿಚಾರೊಲೆನ್ ಮಂಡನೆ ಮಲ್ತೆರ್. ತುಳು ಭಾಷೆದ ವ್ಯಾಪ್ತಿ, ಕಾನೂನಾತ್ಮಕ ಅರ್ಹತೆದ ಬಗ್ಗೆಡ್ ಸವಿವರವಾದ್ ಮಾಧ್ಯಮದ ಬಂಧುಲೆಗ್ ಮನದಟ್ ಮಲ್ತೆರ್. ದ.ಕ. ಸಂಘದ ಡಾ. ಕೆ.ಸಿ. ಬಲ್ಲಾಳ್, ತುಳುವೆರೆಂಕುಲುದ ಡಾ. ಕೆ.ಎನ್. ಅಡಿಗ, ಬೆಂಗಳೂರು ತುಳುಕೂಟದ ಗೌ. ಅಧ್ಯಕ್ಷೆರ್ ಶ್ರೀ ರಾಜೇಂದ್ರ ಕುಮಾರ್ ಕೆ.ವಿ, ತುಳುವೆರೆ ಚಾವಡಿದ ಶ್ರೀ ಉಮೇಶ ಪೂಂಜಾ, ಜೈ ತುಳುನಾಡ್ ದ ಶ್ರೀ ಧನಂಜಯ ಆಚಾರ್ಯ, ಸಂಶೋಧಕಿ,ಪತ್ರಕರ್ತೆ ಪ್ರೊ. ಶ್ರೀಲತಾ, ಐ-ಲೇಸಾ ದಿ’ವಾಯ್ಸ್ ಆಫ್ ಓಷ್ಯನ್ ದ ಪಳ್ಳಿ ವಿಶ್ವನಾಥ ಶೆಟ್ಟಿ, ಜಯಕರ್ನಾಟಕದ ಮಾಜಿ ಕಾರ್ಯಂತೆರ್ ಬೊಕ ಪತ್ರಕರ್ತೆ ಶ್ರೀಮತಿ ಲೀಲಾವತಿ ಶೆಟ್ಟಿ ಈ ಮಾತಾ ಗಣ್ಯೆರ್ ಪಾಲ್ ಪಡೇದ್, ಕರ್ನಾಟಕ ಸರಕಾರ ಆಯಿನಾತ್ ಬೇಗೊಡು ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೊಡುಂದು ಮಾಧ್ಯಮದ ಮೂಲಕ ಒತ್ತಾಯ ಮಲ್ತೆರ್.
ಮಾಧ್ಯಮದ ಬಂಧುಲು ಅಗತ್ಯ ಪ್ರಶ್ನೆಳೆನ್ ಕೇಂಡ್ದ್ ಉಪಯುಕ್ತ ಮಾಹಿತಿ ಪಡೆಯೆರ್. ಭವ್ಯ ಇತಿಹಾಸ, ಸಮೃದ್ಧ ಸಾಂಸ್ಕೃತಿಕ ಹಿನ್ನೆಲೆ ಇಪ್ಪುನ ತುಳು ಭಾಷೆನ್ ಸರಕಾರ ಕಾನೂನಾತ್ಮಕವಾದ್ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪೆರೆ ಮಾಧ್ಯಮದ ಬಂಧುಲು ಸಾಕಾಯ ಮಲ್ಪೊಡುಂದು ಬಿನ್ನಪ ಮಲ್ತಿನ ಶ್ರೀ ಉಪ್ಪಳ ರಾಜಾರಾಮ ಶೆಟ್ಟಿ ಪತ್ರಿಕಾ ಗೋಷ್ಠಿಡ್ ಪಾಲ್ ಪಡೆಯಿನ ಮಾತೆರೆಗ್ಲಾ ಉಡಲ್ ದಿಂಜಿ ಸೊಲ್ಮೆ ಸಂದಾಯೆರ್.
