ಪುತ್ತೂರು ಕಡಬ ಸುಳ್ಯ ತಾಲೂಕಿನ ಜನರಿಗೆ ಬಹುದಿನದ ಬೇಡಿಕೆಯಾದ ವಾಹನ ಚಾಲನಾ ತರಬೇತಿ ಕೇಂದ್ರಕ್ಕೆ 5.40 ಎಕ್ರೆ ಜಾಗ ಮಂಜೂರು

ಆಯುಷ್ ಆಸ್ಪತ್ರೆಗೆ 1.27 ಎಕ್ರೆ ಶಾಸಕ ಅಶೋಕ್ ಕುಮಾರ್ ರೈ ಯವರಿಂದ ಜಾಗದ ಪಹಣಿ ಹತ್ತಾಂತರ

ಪುತ್ತೂರು: ಸುಮಾರು ನಾಲ್ಕೈದು ವರ್ಷಗಳಿಂದ ಪುತ್ತೂರು ಪ್ರಾದೇಶಿಕ ಸಾರಿಗೆ ಇಲಾಖೆಯಿಂದ ಪುತ್ತೂರಿನಲ್ಲಿ ವಾಹನ ಚಾಲನಾ ಪರೀಕ್ಷಾರ್ಥಕ್ಕೆ ಸೆನ್ಸಾರ್ ಅಟೋಮೆಟಿಕ್ ಟ್ರ್ಯಾಕಿಂಗ್ ಸಿಸ್ಟಮ್ ಮತ್ತು ಆಯುಷ್ ಇಲಾಖೆಯಿಂದ ಆಸ್ಪತ್ರೆಗೆ ಇಟ್ಟಿರುವ ಬೇಡಿಕೆ ಇದೀಗ ಈಡೇರಿದೆ. ಡಿ.7ರಂದು ಶಾಸಕರ ಕಚೇರಿಯಲ್ಲಿ ಶಾಸಕ ಅಶೋಕ್ ಕುಮಾರ್ ರೈ ಅವರು ಎರಡು ಇಲಾಖೆಯ ಅಧಿಕಾರಿಗಳಿಗೆ ತಹಸೀಲ್ದಾರ್ ಉಪಸ್ಥಿತಿಯಲ್ಲಿ ಜಾಗದ ಪಹಣಿ ಪತ್ರವನ್ನು ಹಸ್ತಾಂತರಿಸುವ ಮೂಲಕ ಕಳೆದ ನಾಲ್ಕೈದು ವರ್ಷಗಳ ಬೇಡಿಕೆಯನ್ನು ಶಾಸಕ ಅಶೋಕ್ ಕುಮಾರ್ ರೈ ಅವರು ಈಡೇರಿಸಿದ್ದಾರೆ.

ಆಯುಷ್ ಆಸ್ಪತ್ರೆಗೆ ಕಬಕದಲ್ಲಿ 1.27 ಎಕ್ರೆ ಜಾಗ- ರೂ. 8ಕೋಟಿ ಅನುದಾನ:
ಶಾಸಕ ಅಶೋಕ್ ಕುಮಾರ್ ರೈ ಅವರು ಮಾತನಾಡಿ ಪುತ್ತೂರು ವಿಧಾನಸಭಾ ಕ್ಷೇತ್ರದಲ್ಲಿ ಅಭಿವೃದ್ಧಿಯ ಕೆಲಸಗಳು ಆಗುತ್ತಿದೆ. 5 ವರ್ಷದ ಹಿಂದೆ ಆಯುಷ್ ಇಲಾಖೆಯವರು ಆಸ್ಪತ್ರೆಗಾಗಿ ಸುಮಾರು 1.50 ಎಕ್ರೆ ಜಾಗಕ್ಕೆ ಬೇಡಿಕೆ ಇಟ್ಟಿದ್ದರು. ಇದಕ್ಕೆ ಕೇಂದ್ರ ಮತ್ತು ರಾಜ್ಯ ಸರಕಾರದಿಂದ ಶೇ.60 -40ರಂತೆ ಸುಮಾರು ರೂ.15 ಕೋಟಿ ಅನುದಾನ ಬರುತ್ತದೆ. ಈ ಅನುದಾನ ಬರಬೇಕಾದರೆ ಅದಕ್ಕೆ ಮೊದಲು ಜಾಗ ಆಯುಷ್ ಇಲಾಖೆಯ ಹೆಸರಿನಲ್ಲಿ ಆಗಬೇಕು ಎಂದು ನನ್ನ ಗಮನಕ್ಕೆ ತಂದಿದ್ದರು. ಹಾಗಾಗಿ ಅದಕ್ಕಾಗಿ ನಮ್ಮ ಮೊದಲ ಪ್ರಯತ್ನವಾಗಿ ಕಬಕದಲ್ಲಿ 1.27 ಎಕ್ರೆ ಜಾಗವನ್ನು ಈಗಾಗಲೇ ಗುರುತಿಸಿ ಅದನ್ನು ಆಯುಷ್ ಇಲಾಖೆ ಹೆಸರಿನಲ್ಲಿ ಪಹಣಿಯನ್ನೂ ಮಾಡಲಾಗಿದೆ. ಮುಂದೆ ಸುಮಾರು 30 ಬೆಡ್‌ನ ಆಯುಷ್ ಆಯುರ್ವೇದಿಕ್ ಆಸ್ಪತ್ರೆ ಬರುತ್ತದೆ. ಅದರಲ್ಲಿ ಸುಮಾರು 75 ಮಂದಿಗೆ ಉದ್ಯೋಗ ಸಿಗುತ್ತದೆ. ಸರಕಾರದ ಮಟ್ಟದಿಂದ ಮತ್ತು ಹೊರಗುತ್ತಿಗೆ ಆಧಾರದಲ್ಲೂ 50 ಮಂದಿ ಸಿಬ್ಬಂದಿಗಳ ನೇಮಕವಾಗುತ್ತದೆ. ಈಗಾಗಲೇ ಸರಕಾರದ ಆರೋಗ್ಯ ವಿಭಾಗದ ಕಾರ್ಯದರ್ಶಿ ಹರ್ಷಾಗುಪ್ತಾ ಅವರನ್ನು ಮೊನ್ನೆ ಭೇಟಿ ಮಾಡಿ ಈ ಕುರಿತು ಚರ್ಚಿಸಿದ್ದೇನೆ. ಅವರು ತಕ್ಷಣ ಟೆಕ್‌ಅಪ್ ಮಾಡುವ ಭರವಸೆ ನೀಡಿದ್ದಾರೆ. ಮುಂದೆ ರೂ.15 ಕೋಟಿ ಅನುದಾನ ಬರಲಿದೆ. ಆಯುಷ್ ಆಸ್ಪತ್ರೆಯು ದಕ್ಷಿಣ ಕನ್ನಡ ಜಿಲ್ಲೆಯ ಎರಡು ಕಡೆ ಆಗಲಿದೆ. ಉಳ್ಳಾಲದಲ್ಲಿ ಈಗಾಗಲೇ ಎಲ್ಲಾ ಸಿದ್ದತೆ ನಡೆಯುತ್ತಿದೆ ಎದು ಹೇಳಿದ ಅವರು ಪುತ್ತೂರಿಗೆ ಆಯುರ್ವೇದ ಮೆಡಿಕಲ್ ಕಾಲೇಜು ಆಗಬೇಕಾದರೆ ಮೊದಲ ಹಂತದಲ್ಲಿ ಆಸ್ಪತ್ರೆಯು ಆಗಬೇಕಾಗಿದೆ. ಇದಕ್ಕೆ ಎಲ್ಲಾ ಪ್ರಯತ್ನ ಮಾಡುತ್ತಿದ್ದೇವೆ. ಈಗಾಗಲೇ 40 ಎಕ್ರೆ ಜಾಗದಲ್ಲಿ ಮೆಡಿಕಲ್ ಕಾಲೇಜಿಗೆ ಜಾಗ ಇದೆ. ಅದರಲ್ಲಿ 20 ಎಕ್ರೆಯ ಜಾಗದಲ್ಲಿ ಆಯುರ್ವೇದ ಮೆಡಿಕಲ್ ಕಾಲೇಜ್ ಮಾಡುವ ಯೋಜನೆ ಇದೆ ಎಂದರು.

ಮುಂಡೂರಿನಲ್ಲಿ ಆರ್‌ಟಿಒ ಸೆನ್ಸಾರ್ ಟ್ರ್ಯಾಕಿಂಗ್ ಸಿಸ್ಟಮ್‌ಗೆ 5.40 ಎಕ್ರೆ ಜಾಗ:
ಪುತ್ತೂರು ಪ್ರಾದೇಶಿಕ ಕಚೇರಿಯಲ್ಲಿ ಮಾನವ ಶ್ರಮದ ಮೂಲಕ ವಾಹನ ಚಾಲನೆ ಪರೀಕ್ಷಾರ್ಥ ನಡೆಯುತ್ತಿದೆ. ಮುಂದೆ ಯಾವುದೇ ವಾಹನ ಚಾಲನ ಪರವಾಣಿಗೆಯನ್ನು ವಿತರಿಸುವಾಗ ಅದು ಯಾಂತ್ರಿಕೃತ ರೀತಿಯಲ್ಲಿ ನಡೆಯುತ್ತದೆ. ಈ ನಿಟ್ಟಿನಲ್ಲಿ ವಾಹನ ಚಾಲನೆ ಪರೀಕ್ಷಾರ್ಥಕ್ಕೆ ಆರ್‌ಟಿಒ ಸೆನ್ಸಾರ್ ಟ್ರ್ಯಾಕಿಂಗ್ ಸಿಸ್ಟಮ್ ಮೂಲಕ ನಡೆಸುವ ಕಾರ್ಯ ಆರಂಭವಾಗುತ್ತಿದೆ. ಈಗಾಗಲೇ ಉಳ್ಳಾಲದಲ್ಲಿ ಸೆನ್ಸಾರ್ ಟ್ರ್ಯಾಕಿಂಗ್ ಸಿಸ್ಟಮ್ ಆರಂಭವಾಗಲಿದೆ. ಉಳ್ಳಾಲದಲ್ಲಿ ಸಿಸ್ಟಮ್ ಆರಂಭವಾದರೆ ದಕ್ಷಿಣ ಕನ್ನಡ ಜಿಲ್ಲೆಯ ಎಲ್ಲಾ ವಾಹನ ಚಾಲನೆಗೆ ಪರವಾನಿಗೆ ಅನುಮತಿಗೆ ಪರೀಕ್ಷೆ ನೀಡಲು ಅಲ್ಲಿಗೆ ಹೋಗಬೇಕಾಗುತ್ತದೆ. ಇದನ್ನು ಮನಗಂಡು ಪುತ್ತೂರಿನಲ್ಲೇ ಜಾಗ ಗುರುತಿಸಿ ಪಹಣಿಪತ್ರವನ್ನು ಆರ್‌ಟಿಒ ಇಲಾಖೆಯ ಹೆಸರಿನಲ್ಲಿ ಮಾಡಲಾಗಿದೆ. ಪುತ್ತೂರಿನ ಮುಂಡೂರಿನಲ್ಲಿ ಸುಮಾರು 5.40 ಎಕ್ರೆ ಜಾಗ ಪಹಣಿಯಾಗಿದೆ. ಅಲ್ಲಿ ಸುಮಾರು ರೂ.8 ಕೋಟಿ ವೆಚ್ಚದಲ್ಲಿ ಮುಂದಿನ ದಿನ ಸೆನ್ಸಾರ್ ಟ್ರ್ಯಾಕಿಂಗ್ ವ್ಯವಸ್ಥೆ ಬರಲಿದೆ. ಪುತ್ತೂರು, ಸುಳ್ಯ, ಕಡಬ ಮೂರು ತಾಲೂಕಿನವರಿಗೆ ಇದರ ಪ್ರಯೋಜನ ಆಗಲಿದೆ ಎಂದು ಶಾಸಕರು ಹೇಳಿದರು.