ವಿಟ್ಲ: 12 ಸುತ್ತು ವಿಮಾನ ಹಾರಾಟ, ಜನರಲ್ಲಿ ಆತಂಕ*

ವಿಟ್ಲ: ವಿಟ್ಲ ಸುತ್ತಮುತ್ತ ಬಾನಿನಲ್ಲಿ 12 ಸುತ್ತು ಹಾರಾಡಿದ ವಿಮಾನ ಜನರನ್ನು ಆತಂಕಕ್ಕೀಡು ಮಾಡಿದ ಘಟನೆ ಗುರುವಾರ (ಮೇ 14) ನಡೆದಿದೆ. ಎರಡು ವಿಮಾನಗಳು ಈ ರೀತಿ ಹಾರಾಡುತ್ತಿರುವುದು ಕಂಡು ಜನರು ಆಕಾಶದತ್ತ ನೋಡುತ್ತಲೇ ಇದ್ದರು. ಯುದ್ಧದ ಭೀತಿಯಿಂದ ಹೊರಬರಲಾಗದ ನಾಗರಿಕರಿಗೆ ಇದು ಮತ್ತಷ್ಟು ಭಯ ಸೃಷ್ಟಿಸಿತ್ತು.

ಅಧಿಕೃತ ಮಾಹಿತಿಯ ಪ್ರಕಾರ ಬೆಂಗಳೂರಿನಿಂದ ಮಂಗಳೂರಿಗೆ ತಲುಪಬೇಕಾಗಿದ್ದ ವಿಮಾನಗಳು, ಹವಾಮಾನ ವೈಪರೀತ್ಯದಿಂದಾಗಿ ವಿಮಾನ ನಿಲ್ದಾಣದಲ್ಲಿ ಇಳಿಯಲು ಸಾಧ್ಯವಾಗಲಿಲ್ಲ. ಆಗ ಅವು ಹಲವಾರು ಸುತ್ತು ಆಕಾಶದಲ್ಲೇ ಹಾರಾಡಿದವು. ವಿಟ್ಲ ಸುತ್ತಮುತ್ತ 12 ಸುತ್ತು ಹಾರಾಡಿ, ಬಳಿಕ ಸೂಕ್ತ ಅವಕಾಶ ಸಿಕ್ಕಿದ ಕೂಡಲೇ ನಿಲ್ದಾಣದಲ್ಲಿ ಇಳಿದವು ಎನ್ನಲಾಗಿದೆ. ಕೆಲವರು ತಾಂತ್ರಿಕ ಲೆಕ್ಕಾಚಾರಗಳನ್ನು ಹಾಕಿದರೆ, ಮತ್ತೆ ಕೆಲವರು ವಿಮಾನದ ದಾರಿಯನ್ನು ಗಮನಿಸಿ ಚಿತ್ರಣವನ್ನು ನೀಡಿದ್ದರು.

ಸಾಮಾಜಿಕ ಜಾಲತಾಣಗಳಲ್ಲಿ ವಿಧವಿಧದ ಸಂದೇಶಗಳು ಹರಿದಾಡಿದವು. ಚಿತ್ರಗಳನ್ನು ಪಸರಿಸುವ ಮೂಲಕ ಎಲ್ಲರಲ್ಲೂ ಕುತೂಹಲ ಹೆಚ್ಚುವಂತೆ ಮಾಡಲಾಯಿತು. ಶ್ರೀಪ್ರಕಾಶ್ ಕುಕ್ಕಿಲ ಅವರು ಫೇಸ್‌ಬುಕ್‌ನಲ್ಲಿ “ಬೇಕೂಂತ ಬಂದದ್ದಲ್ಲ, ದಾರಿ ತಪ್ಪಿ ಬಂದದ್ದು” ಅಂತ ಸಿನಿಮಾ ಸಂಭಾಷಣೆಯನ್ನು ಬಳಸಿ ಸಂದೇಶ ಹಂಚಿಕೊಂಡಿದ್ದರು.