ಮಗನಿಗೆ ಅಪರೂಪದ, ಪುರಾತನ ಹೆಸರನ್ನ ಇಟ್ಟ ನಟ ಡಾಲಿ ಧನಂಜಯ್‌; ಈ ವಿಶೇಷ ಹೆಸರಿನ ಅರ್ಥವೇನು?

ಡಾಲಿ ಧನಂಜಯ್‌ ಅವರ ಮಗನಿಗೆ ಇಡಲಾದ ಎರೆಯ ಪದಕ್ಕೆ ಸ್ವಾಮಿ, ಒಡೆಯ, ಅಧಿಪತಿ ಎಂದು ಹೆಸರು ಇದೆ. ಇದೊಂದು ವಿಶೇಷ ಮತ್ತು ಅತ್ಯಂತ ಪುರಾತನಕಾಲದ ಹೆಸರು. ಸಾಮಾನ್ಯವಾಗಿ ಈಗಿನವರು ಹೊಸಹೊಸ ಹೆಸರನ್ನ ಆಯ್ಕೆ ಮಾಡಿಕೊಳ್ಳುತ್ತಾರೆ. ಯಾರೂ ಇಡದಂಥ ಹೆಸರನ್ನ ನಾವಿಡಬೇಕು ಎಂದು ಆಧುನಿಕವಾದ ಹೆಸರುಗಳನ್ನ ಮಕ್ಕಳಿಗೆ ಇಡ್ತಾರೆ. ಆದರೆ ಡಾಲಿ ಹಳೇಯದಾದ, ಅಪರೂಪದ ಹೆಸರನ್ನ ಇಟ್ಟಿದ್ದಾರೆ. ಡಾಲಿ ಧನಂಜಯ್‌ ಮತ್ತು ಧನ್ಯತಾ ಅವರು 2025ರ ಫೆಬ್ರವರಿಯಲ್ಲಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಇವರಿಬ್ಬರೂ ಮೊದಲಿನಿಂದಲೂ ಸ್ನೇಹಿತರಾಗಿದ್ದವರು. ಇಬ್ಬರೂ ತಮ್ಮತಮ್ಮ ಫೀಲ್ಡ್‌ನಲ್ಲಿ ಹೆಸರು ಮಾಡಿದವರು. ಧನ್ಯತಾ ಅವರು ಖ್ಯಾತ ಪ್ರಸೂತಿ ವೈದ್ಯೆ. ಇದೇ ವರ್ಷ ಮೇ ತಿಂಗಳಲ್ಲಿ ಈ ದಂಪತಿಗೆ ಮಗ ಹುಟ್ಟಿದ್ದಾನೆ. 4 ತಿಂಗಳ ಬಳಿಕ ದಂಪತಿ ತಮ್ಮ ಮಗುವಿನ ಪರಿಚಯ ಮಾಡಿಸಿದ್ದಾರೆ. ಇನ್ನು ಇವರು ಮಗನಿಗೆ ಇಟ್ಟ ಎರೆಯ ಹೆಸರಿನ ಬಗ್ಗೆ ಅನೇಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಇಮ್ಮಡಿ ಪುಲಕೇಶಿಯ ಬಾಲ್ಯದ ಹೆಸರು ಎರೆಯ ಎಂದೇ ಆಗಿತ್ತು. ಅದನ್ನೇ ಅನೇಕರು ಉಲ್ಲೇಖಿಸಿದ್ದಾರೆ. ʼಬೂಟಾಟಿಕೆಗಾಗಿ ಕನ್ನಡವನ್ನು ಬೆಳೆಸುತ್ತಿದ್ದೀವಿ ಅನ್ನೋರ ಮಧ್ಯ ಕನ್ನಡವನ್ನು ಬಳಸಿ, ಕನ್ನಡತನವನ್ನು ಮೆರೆಸುವವ ಈ ಧನಂಜಯ, ಎರೆಯನ ತಂದೆ ಧನಂಜಯʼ ಎಂಬಿತ್ಯಾದಿ ಕಮೆಂಟ್‌ಗಳನ್ನ ಹಾಕಿದ್ದಾರೆ. ಎರೆಯ ಪದಕ್ಕೂ ಕನ್ನಡಿಗರಿಗೂ ಬಿಡಿಸಲಾಗದ ನಂಟು ಎಂದು ಹೇಳಿದ್ದಾರೆ.